MUHUPI WA MAPÍXIPU A EKEREXA KATÓLIKA OMOSAMPÌKHI

“Ekékhayi enimòtaphulani” (Jo 8,32)

Axinn’aka,

1 – Mahiku yéttaka mathanu ni maxexe mwèri wa Outuúpuru nómwìra tho mwáthanle. Numala mukupitti wàri wòkhalela, nihòniherya ehakhi ya enamanloko ahu.

Nnya, mmwètteloni wa mwáthanle nihòna tho nnyoho nikhumelenle ni owali wòphavela omáliha exariya walá etemokarsiya.

Ninnikhòtta makhalelo óthène òwíviwa atthu anli a epolítika vanòniherya, ni makhalelo mamosa-mosaru, ni invarelo imosaru, wíviwa w’ale akina a khalayi a ipartitu sòhikhala sa kuvernu, wiraneñye khuluwiru numala wìraneya mwáthanle.

2 – Ekerexa Katólika, ntoko mutthenkeso, kherina epartìtu ni khenàkhaliherya anamwìvahererya othanliwa. Masi eyo khenthónyerya wìra ehìreleke mpantta wa epolítika ni makhalelo a mmawàni, mwéttelo wòkhaliherya ophuka etemokarsiya ya exariya ni eniwúrànya atthu, mwa yèyo atthu óthène anikhalàya ni murettele, omutthu ni owanela emuhòli. Sìso, ntoko anamihupi a ekerexa katólika, hiyo mapíxipu khinikhanle òwìkhuràna variyari va mikatxamiho iya sòwalamela siniviriwa mulaponi mwahu ni owali onikeliha muxepani.

3 – Nimùpuwelele mwáthanle ola òkiserya: anamanloko antxène yarepelinwe, khamwirenle mpantta mwáthanle. Nihòna otxompela wòtepaxa osureya nòkhalaru mulaponi mwahu. Vàvo vanòniherya wìra ivonyeriwo amwáthanle avinre anamuntxène àyelèla nroromelo okhala wìra othanla waya khonóneliwa vatthu, khonttittimihiwa, khuhiyarérela ovarela muteko ehakhi aya ela yóthanla.

4 – Vònanara-vo, vasya-tho, nihòna wíyiwa ivòtu vòhirérela. Vòtthikeliwa-tho wuntxereriwa ivòtu sa mwáthanle, mammaru òpakeleliwa ni itthu sikina sinkhunèla ekékhayi. Mikatxamiho sóthène ni wíyiwa ivòtu vòlakeleliwa mwáyìni, sòlipiherya ohiroromeleya mitthenkeso sa mwáthanle, mahóleli anikhòtta emutthu khuyavèha ekékhayi sàphwanelela ale yàkela ororomeliwaka. Sísa nto, annàkeliha anamanloko osuwelaxa ohiroromeleya waya nave tho ohiphwanela waya.

Mwaha wa sòpattheleliwa seiya, mahóleli a mwáthanle animwàkhulela ivùtu sikumiheriwe?

Orumèla nlamulo na mwáthanle okathi wòwàlakhanyiwa ivòtu ni mahóleli alumànyeriwe khonòniherya ororomeleya wa mwáthanle pàhi. Wèmererya ekàmóthiwa onawìye.

5 – Ninnilopola wìra opakiwe wèttakasa wa murettele, masi tho ninnàlopola tho amwávano wìra ehìhiyererye evarihiwaka miteko sòphutulela ni epuruma-puruma. Muhupi olempyàhu mahiku mulokó ni mathannu namosa mwèri w’Apirìle mwàkha wa 2021, nàhihimya wìra amwávano wàkuveya owokeya ni ottharihela ovonyola nlamulo, okhala wìra ekumi aya “kherino nroromelo na omuhòli… ni othoiwa okela makhalelo òttittimiherya ekumi aya”. Ohiya tho vó, ohiroromeleya wa mitthenkeso sa mwáthanle onnintxererya ohiroromela w’anamuntxène. Amwávano ahàna oriyaniwa ni wàkhuliwa sókoha saya.

Ninnilipiherya wìra othawali wùlupalexa wa mulaponi mwahu t’àmwávano. Amwávano ayariwe okathi wa murettele, àkhalano ehakhi ya murettele ni amphavela murettele yòwo. Nihihiye ipartìtu ni makhuru arino owerya yàhononaka amwávano, yàxuttihaka nnyoho, owali ni ohittittimiha exariya ni omutthu aya.

6 – Muhupi ahu, wòlipiherya, ti wòwàlopola atthu óthène wìra nikhòtte epuruma-puruma, ikhirime sa epolítika ni ovonyola etemokarsiya. Nlipiherye ovánela ni otthikiheriwa ekékhayi mwa itthu iye sikhumelenle.

Sìso nto, ninnilopola wìra:

– Nihitthyawelele nnyoho nnari wíhiya owokiwaka;

– Nlipane ovánela, wàlakhanya ivòtu sa mwáthanle varèrelaka wòniherya ipaphelo sòkhalela sivahiwe anamuntxène;

– okumiherya opuro wòkhaliheryana ohólela elapo wáhìso omutthokiha kuvernu a wúràna wa elapo;

– Sìreleke mpantta mitthenkeso sòroromeleya sa mulaponi ohólela miteko sa mwáthanle, vano ni omuhòli;

– Nivaharererye elapo Yomosampìkhi nroromelo nùlupalexa.

Osinserya

7 – Hiyo mapíxipu a ekerexa katólika ya Omosampìkhi ninnàlopola atthu óthène amululuwannye mwáthanle ni mawòwo akhumelenle wìra yìsuwelele ni evekele musammaha ni ekupali exariya, wìra ephwanyé ephiro enkela otthikiherya elapo ahu mwèkumini khuhiya wòva nnyoho.

Elapo Yòmosampìkhi ehitthikele mukhottoni!

Elapo ahu enniphwanela exariya, murettele, omàleleya ni opixa murima! Nilompele murettele, wìra nikhale atthu axariya ni anamòna a ekékhayi.

Omaputo mahiku 22 mwèri wa Outúpuru mwàkha wa 2024